رحلة سارة الشامخ

حكينا كيف بدأت قصة Kids Inc؟

– بعد 4 سنوات من كوني ربة منزل قررت أوسّع شغفي في الفن وصناعة الفعاليات الخاصة بالاطفال لشريحة أكبر من بنتي وصحباتها. بدأت أفكر وأشتغل بحماس وكانت أول جلسة لي مع الأطفال بعد 10 أيام في غرفة بسيطة في بيتي!

من بداية Kids Incإلى اليوم، ايش أكثر شي حصل وأثار فضولك؟

– بصراحة دايمًا أتعلم من الأطفال اللي أقابلهم وأستشعر المتعة بفهم شخصياتهم والفعاليات المفضلة عندهم وايش اللي يثير اهتمامهم وإبداعهم. 

 لاحظنا أنه كثير من الفعاليات اللي تقدميها لها علاقة بـالعلوم والتكنولوجيا والفنون (STEAM)، ليش اهتميتي بهذا المجال وكيف كانت ردة فعل الأطفال تجاهه؟

– حبيت أنه الجلسات اللي نشتغل عليها يدخل فيها العنصر التعليمي للفائدة بطريقة تكون ممتعة. ما أخذ مني وقت كثير أني أكتشف أنه دمج العلم بالفن هي طريقة فعّالة ومفضلة عند الطفل.

 كسيدة أعمال وأم في نفس الوقت، ايش الصعوبات اللي واجهتك وكيف تعاملتي معاها؟ ايش الدروس اللي تعلمتيها من خلال هذي الصعوبات؟

– أعتقد أن الجانب الأكثر صعوبة كان المحاولة والإصرار على الإستمرارية في السنة الأولى. عدد المسجلين كان قليل وكان صعب إقناعهم بالإلتزام. لكني كملت أسوي الشيء اللي أحبه وحبة حبة صار عندي عملاء يحملون ولاء كبير لKids Incوقدرت أشاركهم فلسفتي وتجاربي بكل سهولة. هذي التجربة عطتني دافع كبير للإستمرار وزادت ثقتي بنفسي.

 أول حاجة حابين نقولك مبروك Kids Incقرب يكمل ثلاث سنوات من “بدايته”/”من بداية انطلاقه”! هل تديرين أعمال Kids Incلوحدك أو استعنتي بأشخاص لمساعدتك؟ في حال وجود شخص لمساعدتك ايش أهم الصفات اللي مهم يمتلكها ليصبح موظف Kids Incالمثالي؟

– شكرًا! نعم إلى الآن أدير عملي بنفسي طول الوقت ولكن عندي مساعدة لطيفة تساعدني في الأيام اللي أكون مضغوطة فيها وهيا اللي تهتم بحفلات أعياد الميلاد.

بالنسبة للجزء الثاني من السؤال بقول أنه موظف Kids Incلازم يكون مرن وعنده طاقة وصبور مع الأطفال وشقاوتهم!

 

 

 كلمينا عن استراتيجات أو أدوات التسويق اللي استعنتي فيها للترويج لKids Incسواءً من منصات تواصل اجتماعي أو تطبيقات وغيرها؟

– (Instagram)كان أكثر وسيلة مفيدة بالنسبة لي وأقدر أوصل منه للفئة المستهدفة، أستخدمت (Canva)لتصميم الحاجات اللي أنزلها وكمان للإعلانات وإرشادات أو تعليمات الإستخدام، وطبعًا (WhatsApp) هو الوسيلة المفضلة عندي للتواصل المباشر.

 

لو فكّرتي في شيء واحد كان بيساعدك ويسهل لك بداياتك، ايش راح يكون؟

– أعتقد وجود موقع إلكتروني بخدمات دفع فورية شيء كنت أحب إني أستثمر فيه من البداية، بس زي ما يقال “أن تصل متأخرًا خير من أن لا تصل”.

مرة حبينا فكرة Mermaid Tail Kitوكيف لاقت هذا القبول، فحابين نعرف مصدر الإلهام خلف هذي الفكرة؟

– شفت نشاط عند @hatchartstudioكان عبارة عن صناعة ذيل حورية بحر بالقطن وبعدها بنيت فكرة إني أسوي صندوقفيه كل أدوات ومتعلقات حورية البحر.

بالرغم من تنوع الفعاليات في Kids Incقررتي بفتح نادي للبنات، أي أهداف يتطلع Kids Incلتحقيقها من هذا النادي؟

– لكذا سبب، منها أنه نوع المشاريع اللي نشتغل عليها فيKids Incتركز على الأشياء اللي تجذب البنات زي اليونيكورن (Unicorn). الشيء الثاني هو إني كنت أحب فكرة وجود مكان للبنات يكوّنوا فيه صداقات ويقضوا وقتهم باستمتاع  كل أسبوع.

 Kids Incمو بس يركز على الأعمال الفنية واليدوية المبتكرة كمان لاحظنا أنه يتضمن أنشطة بدنية للأطفال زي اليوقا، هل هناك أي نشاط حركي مختلف تخططين لتدريب الأطفال عليه مستقبلًا؟

– في البداية كنت أبغى أدخل اليوقا وبعض أنواع التمارين الرياضية لجلساتنا بس بعدين وقفناها لأنه كان يحتاج شغل كثير بتقليب المكان وترتيب الطاولات عشان يناسب الفعالية. الآن مركزين على الجلسات الفنية للأطفال من عمر 4-11. وطبعًا النشاط الأقرب لقلبي (Zumbini) وهي حصة رقص للصغار.

 

واحد من أكثر المشاكل اللي يواجهها رواد الأعمال في بداياتهم هي المشاكل المالية، كيف تجاوزتيها وكيف قمتي بتسعير الخدمات في بدايتك؟

– النظام اللي مشيت عليه أقدر أسميه “Baby steps” أي إني كنت أمشي خطوة بخطوة وما أستعجل، فكل شيء كنت أمشي فيه بهدوء وثبات. سعّرت الحصص أو الجلسات اللي أقدمها بناء على أسعار النشاطات المشابهة له بمدينة جدة.

 

في الخمس سنوات الجاية، وين راح يكون Kids Inc؟

– أشوف الفريق يتوسع ويكبر والتركيز يكون أكثر على أننا نخلي الجلسات أونلاين ونستمر في تجهيز وتنسيق حفلات الأطفال.

أذكري لنا مفهوم شائع عن رائدات الأعمال تختلفين معه؟

– ما أعرف المفاهيم الشائعة الخاطئة بس كل اللي أعرفه أن النساء إذا اشتغلوا بشيء هم شغوفين فيه جهدهم وعطائهم يكون غير محدود.

تلو كان عندك الفرصة للتعاون مع أحدى الشركات أو الفعاليات الموسمية، مع مين حابة يكون هذا التعاون؟

– بيكون جدّا ممتع لو اشتغلت مع جرير، أتخيل إني أسوي سلسلة من الأعمال اليدوية باستخدام منتجات روكو (Roco) 😍.

ايش النصيحة اللي حابة توجهينها لرائدات الأعمال خاصةً في السعودية؟

– قدرة وتأثير مواقع التواصل الإجتماعي لا يستهان بها أبدًا! كل ما قضيتي وقت في تعلمها وطريقة استخدامها صح كل ما أعطتك أكثر. الشغف والإيمان بمشروعك يظهر من خلال عملك وهو اللي يميزه.